नेपालगञ्ज। बाँकेको कोहलपुरस्थित जिल्ला सैनिक बोर्ड (डीएसबी) को परिसरमा भारतीय भूतपूर्व सैनिक तथा तिनका आश्रित परिवारजनको स्वास्थ्यलाई मध्यनजर गर्दै नवस्थापित पोलिक्लीनिकको भव्य रूपमा औपचारिक उद्घाटन गरिएको छ। एक विशेष तथा गरिमामय समारोहका बीच नेपालस्थित भारतीय दूतावासका रक्षा सहचरी (डिफेन्स एट्याची) कर्णेल भि. सुब्रमण्यमले तामझामका साथ उक्त पोलिक्लीनिकको उद्घाटन गर्नुभएको हो ।
भूतपूर्व विकास समितिका अध्यक्ष क्याप्टेन कुमार बहादुर रानाको अध्यक्षतामा सम्पन्न उक्त समारोहलाई सम्बोधन गर्दै प्रमुख अतिथि कर्णेल सुब्रमण्यमले स्वास्थ्य नै सबैभन्दा ठूलो सम्पत्ति भएको उल्लेख गर्नुभयो । उहाँले बाँके तथा आसपासका क्षेत्रमा बसोबास गर्ने सम्पूर्ण भारतीय भूतपूर्व सैनिक र उहाँहरूका परिवारलाई नवनिर्मित पोलिक्लीनिकबाट उपलब्ध हुने गुणस्तरीय स्वास्थ्य जाँच, परामर्श तथा उपचार सेवाको अधिकतम लाभ लिन आग्रह गर्नुभयो ।
सम्बोधनकै क्रममा कर्णेल सुब्रमण्यमले भूतपूर्व सैनिकहरूले झेल्दै आएका विविध व्यावहारिक समस्याहरूबारे गम्भीर चासो व्यक्त गर्नुभयो। विशेषगरी लामो र झन्झटिलो मानिने पेन्सन व्यवस्थापन तथा आवश्यक कागजी प्रक्रिया (डकुमेन्टेसन) लाई प्रविधिमैत्री, सहज र छरितो बनाउन उच्च प्राथमिकताका साथ पहल भइरहेको स्पष्ट पार्नुभयो। देश र संगठनका लागि जीवनको ऊर्जावान् समय अर्पेका वीर योद्धाहरूको हित, सम्मान र समस्या समाधानका निम्ति आफूहरू सदैव प्रतिबद्ध रहने विश्वास समेत उहाँले दिलाउनुभयो ।
सो अवसरमा उपस्थित भूतपूर्व सैनिकहरूले दैनिक जीवन, औषधि उपचार तथा प्रशासनिक काम-कारबाहीका क्रममा भोग्नुपरेका विभिन्न कठिनाइ र गुनासाहरू रक्षा सहचरीसमक्ष खुलेर राख्नुभएको थियो । औपचारिक कार्यक्रमपश्चात् आपसी भाइचारा, आत्मीयता र एकतालाई थप प्रगाढ बनाउने उद्देश्यले परम्परागत ‘बडा खाना’ (सामूहिक प्रीतिभोज) को समेत भव्य आयोजना गरिएको जानकारी समितिका उपाध्यक्ष दान बहादुर गुरुङले दिनुभयो ।
महासचिव खड्ग रजाली मगरले कुशलतापूर्वक सञ्चालन गर्नुभएको उक्त ऐतिहासिक कार्यक्रममा जिल्लाभरिका उल्लेख्य संख्यामा भारतीय भूतपूर्व सैनिक, वीर नारी तथा परिवारजनको बाक्लो एवं उत्साहजनक उपस्थिति रहेको थियो ।
